Teleskopi Hapësinor James Webb ka kapur imazhe të reja të Uranit që tregojnë unazat e fshehura tipike të gjigantit të akullit, hënat, motin dhe atmosferën. Teleskopi Webb është i njohur për marrjen e pamjeve mahnitëse të objekteve të largëta kozmike me shumë detaje, por observatori hapësinor është gjithashtu i aftë të zbulojë njohuri të reja në “oborrin” tonë qiellor. Vështrimi i parë i mirë i njerëzimit ndaj Uranit erdhi kur Voyager 2 fluturoi pranë planetit të shtatë nga dielli në vitin 1986. Nëpërmjet kamerës së anijes kozmike, e cila shikonte sistemin diellor në dritën e dukshme, Urani dukej se ishte një botë blu e shndritshme. Por Webb, i cili e shikon universin përmes dritës infra të kuqe të padukshme për syrin e njeriut, kapi të gjitha aspektet që shpesh mungojnë në imazhet e tjera të teleskopit, duke zbuluar natyrën dinamike të planetit.
Dërgimi i një misioni të dedikuar për të studiuar Uranin është bërë një prioritet për astronomët, sipas një raporti të publikuar në 2022. I publikuar nga NASA, imazhi përfshin më shumë detaje se një version i mëparshëm i lëshuar në prill. Unazat normalisht të zbehta të brendshme dhe të jashtme të Uranit shkëlqejnë në imazhin e fundit, duke përfshirë unazën Zeta më të afërt, por tepër të zbehtë dhe të përhapur të planetit. Nëntë nga 27 hënat e njohura të Uranit mund të shihen gjithashtu si pika blu, duke përfshirë disa nga ato më të voglat që ekzistojnë brenda unazave RTSH
