Rusia ka rifilluar përdorimin e bombarduesve strategjikë për sulmet ndaj Ukrainës për herë të parë në më shumë se dy muaj, tha sot komandanti ushtarak i Kievit, Serhiy Popko. “Pas një pushimi të gjatë prej 79 ditësh, armiku ka rifilluar sulmet ajrore me raketa nga avionët strategjikë të forcave ajrore Tu-95MS”, tha Popko në Telegram. Raketat ishin lëshuar nga disa bombardues pranë Engels në rajonin rus të Saratovit. “Asnjë objektiv armik nuk arriti në qytet”, shtoi shefi i administratës ushtarake. Megjithatë, disa shtëpi u dëmtuan nga mbeturinat dhe valët e shpërthimit në periferi të kryeqytetit, ku jetojnë rreth 3 milionë njerëz. Sipas Forcave Ajrore të Ukrainës, 14 raketa u kapën, nga 19 gjithsej të lëshuara. Goditje u raportuan edhe në rajonin lindor të Ukrainës të Dnipropetrovsk pranë Pavlohrad. Metropoli lindor i Ukrainës, Kharkivi, u sulmua gjithashtu me gjashtë raketa S-300 me bazë tokësore gjatë natës. Autoritetet raportuan se të paktën një person u vra dhe katër të tjerë u plagosën nga bombardimet ruse pranë vijës së frontit në Kupjansk. Ukraina ka frenuar pushtimin në shkallë të plotë të Rusisë për më shumë se 21 muaj, me mbështetjen perëndimore.
