Në një lëvizje të rrallë, sekretari i përgjithshëm i Kombeve të Bashkuara, António Guterres i ka kërkuar Këshillit të Sigurimit të OKB-së të ndërmarrë veprime për të shmangur katastrofën humanitare në Rripin e Gazës. Në një letër drejtuar Këshillit të Sigurimit, shefi i OKB-së bëri thirrje për zbatimin e nenit 99 të Kartës së OKB-së për herë të parë që nga marrja e detyrës në 2017. “Humbja masive e jetëve në Rripin e Gazës dhe në Izrael brenda një periudhe relativisht të shkurtër kohore nxiti vendimin e Guterres për të zbatuar nenin 99”, sipas OKB-së. Kjo i lejon sekretarit të përgjithshëm të tërheqë vëmendjen e Këshillit të Sigurimit për çështje që, sipas mendimit të tij, mund të rrezikojë ruajtjen e paqes dhe sigurisë ndërkombëtare. Sipas OKB-së, neni 99 nuk është përdorur për dekada. “Përballë një rreziku të rëndë të kolapsit të sistemit humanitar në Gaza, i bëj thirrje Këshillit të ndihmojë në shmangien e një katastrofe humanitare dhe apeloj që të shpallet një armëpushim humanitar”, tha Guterres në platformën X, e njohur më parë si Twitter. Ai përshkroi situatën e rëndë për civilët në brezin e ngushtë bregdetar të tokës, duke paralajmëruar për shkatërrimin total të shoqërisë civile dhe përhapjen e sëmundjeve për shkak të mbipopullimit në kushte çnjerëzore të jetesës. Pothuajse 1,9 milionë, më shumë se tre të katërtat e popullsisë së Rripit të Gazës, janë detyruar të lënë shtëpitë e tyre duke u strehuar në një hapësirë gjithnjë në rënie në Rripin jugor të Gazës.
