Prefekti i Qarkut Korçë, Nertil Jole, së bashku me nënprefektin Henrik Rusi, bënë një ndalesë në fshatin Qytezë të bashkisë Devoll, për të parë punimet në kuadër të programit “Rigjenerimi Urban 2022-2024”. Për Qytezën por edhe për Dardhën, Arrëzën, Sinicën, Leusën, Rehovën e Sotirën është duke u zbatuar projekti zhvillimor i ndërhyrjeve rigjeneruese të këtyre fshatrave me potencial turistik, me financim të qeverisë shqiptare nëpërmjet Fondit Shqiptar të Zhvillimit me vlerë 178,982,059 lekë me TVSH. “Këto fshatra janë kualifikuar si pjesë e programit të “100 fshatrave” dhe kanë një potencial të madh për zhvillimin e turizmit, sidomos atij dimëror”, shkroi prefekti Jole, në një postim në rrjetet sociale ku ndau dhe fotografi nga Qyteza. Ndërhyrjet në fshat, përfshijnë përmirësimin e infrastrukturës, punime në rrugë dhe shtigje, sistemimin e hapësirave publike, zonave rekreative, përmirësimin e aksesit drejt atraksioneve natyrore turistike, të cilat ndihmojnë për krijimin e produkteve turistike dhe përmirësimit të infrastrukturës mikpritëse. “Ndërhyrje të kësaj natyre shtojnë premisat e një zhvillimi të ri turistik dhe fuqizimit të ekonomisë lokale, për promovimin e natyrës së mrekullueshme që këto fshatra kanë, duke e pasuruar edhe më shumë ofertën unikale që ofron qarku ynë”, tha prefekti i Qarkut Korçë.
