Presidenti egjiptian, Abdel-Fatah al-Sissi paralajmëroi për pasojat e zhvendosjes së detyruar të palestinezëve nga Rripi fqinj i Gazës, tani në qendër të një bombardimi masiv izraelit.
Në Egjipt, vendi i parë arab që nënshkroi një traktat paqeje me Izraelin në vitin 1979, u rritën shqetësimet për një eksod masiv në Gadishullin Sinai të Egjiptit pasi ushtria izraelite u tha njerëzve në Gazën veriore të shkonin në jug, ndërsa afrohet një ofensivë tokësore izraelite.
Rafah në Egjipt, i vetmi vendkalim kufitar në Rripin e Gazës që nuk kontrollohet nga Izraeli, aktualisht është i mbyllur, megjithëse po i bëhet presion Egjiptit dhe Izraelit për ta rihapur atë, të paktën për dërgimin e ndihmave.
“Egjipti kundërshton përpjekjet për të likuiduar kauzën palestineze me mjete ushtarake ose zhvendosje”, tha sot al-Sissi në një konferencë të përbashkët shtypi me kancelarin gjerman Olaf Scholz.
”Ideja e zhvendosjes me forcë të popullsisë së Gazës në Egjipt dhe popullsisë së Bregut Perëndimor në Jordani nuk është e realizueshme dhe ne paralajmërojmë për rreziqet e përfshira”, tha al-Sissi.
