Lufta kundër Tajvanit mund të çonte në kolaps ekonominë kineze

Ekonomia e Kinës do të shkonte drejt kolapsit nëse Pekini do të hynte në luftë me Tajvanin, tha sekretari i Jashtëm britanik, James Cleverly, teksa mbrojti politikën e tij të angazhimit të qartë me Pekinin. Sekretari i Jashtëm tha se shqetësimet për fuqinë e ekonomisë së Kinës tashmë po e detyronin Partinë Komuniste në pushtet të ndryshonte kursin. Cleverly u bë sekretari i parë i Jashtëm i Mbretërisë së Bashkuar që vizitoi Kinën në pesë vjet kur ai bëri udhëtimin në Pekin në gusht. Në një konferencë të Partisë Konservatore të organizuar nga ”Spectator”, Cleverly tha se lufta midis Kinës dhe Tajvanit do të ishte një “dështim masiv i politikës së jashtme” sepse “situata në ngushticën e Tajvanit është punë e të gjithëve”. Tajvani është një ishull vetëqeverisës për të cilin Kina e pretendon si territor të vetin dhe tensionet kanë qenë të larta vitet e fundit. Pekini ka rritur manovrat e tij ushtarake që synojnë ishullin, duke dërguar avionë luftarakë dhe anije të marinës për të patrulluar dhe mbajtur stërvitje në ujërat dhe qiejt përreth tij. Ai tha se parandalimi i një konflikti në Tajvan “është një pikë thelbësore absolute e politikës së jashtme të Mbretërisë së Bashkuar”. Cleverly tha se besonte se pas bisedës së tij me homologun e tij Wang Yi në Kinë se Pekini ishte i ndjeshëm ndaj rrezikut të përçarjes ekonomike si rezultat i politikave së vet. Ai tha se populli kinez e kishte detyruar tashmë qeverinë të ndryshonte kursin mbi politikën e saj ”zero Covid-19”, në shenjë pakënaqësie publike me administratën e Xi Jinping. Në një ilustrim të gjendjes së ekonomisë së Kinës, Cleverly tha se Mbretëria e Bashkuar vlerëson se papunësia e të rinjve në Kinë shkon në 25% dhe “ka më shumë apartamente të lira të sapondërtuara sesa popullsia e MB”.