Lula: OKB-ja të marrë masa për krizën klimatike dhe pabarazinë

Presidenti brazilian, Luiz Inácio Lula da Silva bëri thirrje për një luftë të vendosur kundër ndryshimeve klimatike dhe pabarazisë sociale në rritje, gjatë fjalimit të tij në Asamblenë e Përgjithshme të OKB-së, në Nju Jork. “Kriza klimatike po troket në derë dhe po shkatërron atdheun tonë”, tha sot lideri i vendit më të madh të Amerikës Latine në Asamblesë së Përgjithshme të OKB-së. “Njerëzit në vendet e varfra po vuajnë veçanërisht keq nga ndryshimet klimatike, të cilat shkaktohen kryesisht nga bota e zhvilluar”, tha Lula. Ai u bëri thirrje sërish vendeve të pasura të japin 100 miliardë dollarë në vit për mbrojtjen e klimës në vendet në zhvillim, një premtim i kahershëm që ka mbetur i paplotësuar. Presidenti brazilian bëri thirrje gjithashtu për më shumë veprime në luftën kundër dhunës ndaj grave, si dhe forcimin e të drejtave të homoseksualëve dhe personave me aftësi të kufizuara. Në dritën e tensioneve gjeopolitike në rritje, Lula paralajmëroi per rrezikun ndaj përpjekjeve për të ndarë botën në zona ndikimi dhe për të ringjallur Luftën e Ftohtë. “Lufta në Ukrainë e bën të qartë se ne të gjithë jemi të paaftë për të zbatuar qëllimet dhe parimet e Kartës së OKB-së. Promovimi i një kulture paqeje është detyrë e të gjithëve ne”, tha Lula.