BE autorizon prodhimin e vaksinës së përshtatur kundër Covid-19

Komisioni Evropian ka miratuar një version të përditësuar të vaksinës Covid-19 të zhvilluar nga BioNTech-Pfizer. “Vaksina e përshtatur nga Comirnaty XBB.1.5 është ndryshuar për herë të tretë për t’iu përgjigjur varianteve të reja të Covid-19 dhe është autorizuar për të rriturit, fëmijët dhe foshnjat mbi 6 muajsh”, tha komisioni në një njoftim për shtyp të premten. “Vaksina e përditësuar Covid synon variantet në zhvillim dhe ato të përhapura”, tha komisionerja e Shëndetësisë e BE-së, Stella Kyriakides. Qendra Evropiane për Parandalimin dhe Kontrollin e Sëmundjeve (ECDC) tha në përditësimin e saj të fundit se rastet e Covid-19 në BE janë në rritje, por shkalla e infeksionit mbetet në një nivel të ulët. “Covid-19 do të qarkullojë paralelisht me gripin sezonal gjatë sezonit të ardhshëm të vjeshtës dhe dimrit dhe ne duhet të jemi të përgatitur”, tha Kyriakides. BioNTech me qendër në Gjermani fitoi famë ndërkombëtare për zhvillimin e vaksinës kundër Covid-19 bazuar në teknologjinë e saj të re mRNA (acid ribonukleik). Gjatë vitit 2021, BioNTech dhe kompania partnere amerikane Pfizer furnizuan më shumë se 2,6 miliardë doza të vaksinës kundër koronavirusit. Kjo shifër ra në rreth 2 miliardë vitin e kaluar.