Ukraina e vlerëson si të suksesshme ofensivën kundër forcave ruse

Ukraina pretendon se ka kryer ofensiva “të suksesshme” kundër Rusisë në rajonin jugor Zaporizhzhia gjatë javës së kaluar, transmeton Anadolu. “Në jug, Forcat e Mbrojtjes të Ukrainës vazhdojnë të kryejnë operacione ofensive në drejtimet Melitopol dhe Berdiansk. Në drejtimin Mala Tokmachka-Robotyne të rajonit Zaporizhzhia, sulmet ishin të suksesshme”, tha zv.ministrja e Mbrojtjes e Ukrainës, Hanna Maliar në Telegram. Maliar pohoi se forcat ukrainase kanë rimarrë nën kontroll gjithsej 204.7 kilometra katrorë në jug, duke përfshirë 12.6 kilometra katrorë gjatë javës së kaluar. Në frontin lindor, ajo tha se forcat ruse vazhduan të përqendrojnë përpjekjet e tyre kryesore në drejtimet Kupiansk, Lyman, Bakhmut, Avdiivka dhe Marinka, duke shtuar se më shumë se 170 beteja u zhvilluan në këto drejtime gjatë javës së kaluar. Sipas zv.ministres ukrainase, forcat ruse u përpoqën të përparonin në këto drejtime, por ishin “të pasuksesshëm”. “Në drejtim të qytetit Bakhmut, armiku u përpoq me të gjitha forcat të ndalonte përparimin tonë gjatë javës, por mbrojtësit tanë avancuan gradualisht. Zona e çliruar në drejtimin Bakhmut është 37 kilometra katrorë në total. Dy kilometra katrorë u çliruan brenda një jave”, tha ajo. Ajo kujtoi gjithashtu pretendimet e së enjtes se forcat ukrainase rimorën fshatin Staromaiorske. Zyrtarët rusë nuk kanë komentuar ende situatën dhe pretendimet ukrainase nuk mund të verifikoheshin në mënyrë të pavarur për shkak të luftës në vazhdim. atsh