Australi, TikTok mund të përballet me një ndëshkim ligjor

Aplikacioni TikTok mund të përballet me një ndëshkim ligjor në Australi pas dështimit për të paraqitur dokumente përpara një komiteti të Senatit që heton ndërhyrjet e huaja përmes mediave sociale. Senatori James Paterson, i cili kryeson komitetin, tha se TikTok nuk ka arritur t’i përgjigjet pyetjeve të komitetit dhe të paraqesë dokumentet e kërkuara. Komiteti kishte kërkuar nga TikTok që deri më 14 korrik të dorëzojë përgjigje për 15 pyetje në lidhje me procesin e mbledhjes së të dhënave të aplikacionit dhe qasjen e inxhinierëve kinezë në të dhënat e përdoruesve australianë. Sipas “Sky News”, çdo person që refuzon një urdhër të ligjshëm të komitetit të Senatit mund të gjobitet ose të burgoset deri në 6 muaj. Në prill të këtij viti, qeveria australiane i ndaloi zyrtarët e saj të përdorin aplikacionin TikTok në pajisjet e tyre. Zyrtarët e aplikacionit TikTok e quajtën vendimin “zhgënjyes”. Australia ishte vendi i fundit në aleancën e inteligjencës “Five Eyes”, që përfshin Australinë, Kanadanë, Zelandën e Re, Mbretërinë e Bashkuar dhe SHBA-në, vendet këto që ndaluan zyrtarët e tyre të përdorin aplikacionin kinez në pajisjet e tyre profesionale. RTSH