Macron: Pjesëmarrja e Zelensky në G7

Presidenti francez, Emmanuel Macron shpreson që pjesëmarrja e presidentit ukrainas, Volodymyr Zelensky në mbledhjen e shtatë vendeve kryesore të industrializuara (G7), në Japoni do t’i ndihmojë vendet si Brazili dhe India të kuptojnë më mirë situatën e Ukrainës. Duke komentuar faktin se një avion i qeverisë franceze e çoi Zelensky në takimin e Ligës Arabe në Arabinë Saudite përpara se ta sillte atë në Hiroshima, Macron tha se kjo ishte gjithashtu një sinjal për ndërtimin e paqes dhe kërkimin e zgjidhjeve. “Kjo ishte në interesin e Francës dhe rolit të saj si një anëtare e përhershme e Këshillit të Sigurimit të OKB-së, që të lejonte Zelensky të fliste para disa fuqive botërore që ndonjëherë ekspozohen vetëm ndaj një diskursi”, u tha Macron gazetarëve. Ai iu referua një takimi të ardhshëm të vendeve të BRICS, përkatësisht Brazilit, Rusisë, Indisë, Kinës dhe Afrikës së Jugut. “Kjo është shumë e rëndësishme për ne, sepse parandalon një ndarje të botës midis atyre që mbështesin qartë Ukrainën dhe atyre që thonë se mbështesin paqen, ndonjëherë pa e ditur se çfarë do të thotë saktësisht”, tha Macron. Zelensky iu bashkua konsultimeve në samitin e G7, në Hiroshima midis vendeve kryesore të industrializuara perëndimore dhe vendeve partnere, të cilat përfshijnë Indinë dhe Brazilin, asnjëra prej të cilave nuk ka treguar një mbështetje të qartë për Kievin mes pushtimit të Ukrainës nga Kremlini.atsh