Danimarka ka miratuar për Ukrainën një paketë me pajisje ushtarake, ndërsa Kievi përgatitet për ofensivën që synon të rimarrë tokën e pushtuar nga Rusia. “Paketa, me vlerë 1.7 miliardë korona daneze (250 milionë dollarë), përfshin automjete të çminimit dhe rikuperimit të blinduar, municione dhe fonde për prokurimin e pajisjeve të mbrojtjes ajrore”, sipas Ministrisë Daneze të Mbrojtjes. “Paketa synon të forcojë aftësinë e Ukrainës për të kryer një ofensivë në muajt e ardhshëm”, tha ministria në deklaratën e saj. Kjo është paketa më e madhe që i është dhënë Ukrainës nga një anëtar skandinav i BE-së që nga fillimi i luftës. Danimarka ka mbështetur vazhdimisht Ukrainën, duke ofruar ndihmë ushtarake dhe financiare që kur Kremlini nisi pushtimin e tij në shkallë të plotë, në shkurt të vitit 2022. “Danimarka gjithashtu ka planifikuar t’i ofrojë NATO-s një batalion me 700 deri në 1200 ushtarë për të mbrojtur shtetet baltike nga mesi i vitit 2024”, thanë zëvendësministri danez i Mbrojtjes, Troels Lund Poulsen dhe ministri i Jashtëm, Lars Løkke Rasmussen pas një takimi të komitetit parlamentar të Punëve të Jashtme, sipas agjencisë së lajmeve “Ritzau”. atsh
- Advertisment -