Eksportet shqiptare drejt Maqedonisë së Veriut shënuan rritje me 2.4 miliardë lekë përgjatë 2-mujorit janar-shkurt të vitit 2023. Sipas të dhënave zyrtare të INSTAT për tregtinë e jashtme, gjatë periudhës janar-shkurt u eksportuan drejt Maqedonisë së Veriut mallra me vlerë gati 6 miliardë lekë. INSTAT bëri të ditur se, gjatë 2-mujorit të vitit që shkoi edhe importet shënuan një rritje të lehtë me rreth 100 milionë lekë. Referuar të dhënave, importet rezultojnë në shifrat e 1.9 miliardë lekëve, kundrejt 1.8 miliardë lekëve që ishin në 2 muajt e 2022-shit. Produktet më të eksportuara vazhdojnë të mbeten produktet e freskëta: domate, tranguj, peshk i freskët, agrumet e freskëta, prodhime brumi etj. Shqipëria dhe Maqedonia e Veriut bashkëpunojnë ngushtë në kuadër të zbatimit të marrëveshjes CEFTA 2006 dhe që nga viti 2011, tregtia mes dy vendeve është liberalizuar dhe operohet pa tarifa doganore.
- Advertisment -