Agjencia për Zhvillim Bujqësor dhe Rural, përmes programit IPARD II ka mbështetur zhvillimin e turizmit rural dhe të sipërmarrjeve agroturistike në vend. Ndërthurja midis potencialit turistik dhe atij bujqësor ofron mundësi shumë të mira për zhvillimin e mëtejshëm të këtij sektori. Në kuadër të programit IPARD II, deri më sot janë nënshkruar 78 kontrata në mbështetje të zhvillimit të turizmit rural. Këto investime përfshijnë ndërtimin apo rikonstruksionin e ndërtesave tradicionale dhe shndërrimin e tyre në bujtina, ndërtimin e sipërmarrjeve agroturistike, krijimin e fermave me prodhim cilësor, si edhe ndërtimin e mjediseve argëtuese për veprimtari sportive, çlodhëse, hipizëm, etj. Sipërmarrjet agroturistike janë shndërruar në shembuj të suksesshëm për zhvillimin e ekonomive familjare rurale, rritjes së punësimit dhe përmirësimit të standardeve të jetesës në këto zona. Granti i dhënë për këto investime ka arritur vlerën 14,2 milionë euro, të cilat janë fonde të Bashkimit Evropian në bashkëfinancim me qeverinë shqiptare. atsh
