Kadastra, 1.3 milionë shërbime çdo vit

Ish-drejtori i Kadatrës, Artan Lame deklaroi sot se, janë 250 mijë legalizime të bëra dhe janë dhënë 1.3 milionë shërbime çdo vit nga ky institucion. “Para disa kohësh, në një emision thashë se Kadastra nuk përbën më lajm, në kuptimin që tashmë ka hyrë në rutinën e punës së saj të përditshme. Nga ana tjetër më dha një lloj trishtimi sepse jam mësuar me gjëra që kanë ritme të shpejta që kanë ndjesë. Kjo ishte një dilemë e imja, që ka pak kohë që më bren. Me gjithë problemet që ka, janë 1.3 milionë shërbime të dhëna çdo vit në kadastër. E gjitha kjo ka në themel reformën e pronës”, deklaroi Lame. Lame tha se, përtej kontributit që kanë persona të veçantë, kjo reformë nuk do ishte marrë kurrë pa Edi Ramën. “Askush tjetër nuk do t’i kishte hyrë këtij qederi përveçse një njeri si ai. Unë nuk e kam vuajtur impostimin e tij në vendimmarrjet e mia. Kemi diskutuar, kam dëgjuar, edhe kemi debatuar, por në momentin pas kësaj kam qenë gjithmonë i lirë në vendimmarrjet e mia. Ky ka qenë një sektor që gjithmonë frynte nga frynte paraja ose politika”, u shpreh Lame. Sipas Lames, kjo mos ndërhyrje e Kryeministrit në vendimmarrje ka pasur edhe një të keqe të vogël. “Besimi i tij total tek unë ka bërë që një pjesë e stafeve të mos ndiejnë që ka një sy nga lart që i shikon dhe që ju kërkon llogari. Një pjesë e stafeve e kanë ndier veten të pavarur dhe pjesë e një të tëre që është qeverisja. Drejtori i ri duhet të ndiejë këtë sy të Kryeministrit mbi vete”, theksoi ai më tej. atsh