Monitorimi i jetës së egër përmes kamerave kurth është një proces i rëndësishëm për t’u dokumentuar përgjatë sezonit dimëror. Specialistët e Administratës së Zonave të Mbrojtura Lezhë, së bashku specialistët e PPNEA, kanë realizuar monitorimin e zonës në parkun natyrorë të Munellës. Më tej, ata kanë bërë të mundur vendosjen e disa kamerave kurth në pika të ndryshme, të tilla si: në Majën e Runes, Qaf Plep, sipër staneve të Xhuxhes dhe afër Gurit të Nuses. Moratoriumi i gjuetisë, gjithashtu edhe kujdesi i vazhdueshëm i stafeve të zonave të mbrojtura po dëshmojnë çdo ditë rigjenerimin e faunës së egër në vendin tonë. Parku Natyror i Munellës në Pukë është kthyer në një atraksion dhe vlerë të shtuar në guidat turistike për potencialet e veçanta që bart. Vendosja e kamerave kurth në zonat e mbrojtura ka për qëllim vrojtimin e faunës së egër që ndodhet në këto zona. Llojet e faunës së egër jetojnë të qeta në habitatet e tyre falë moratoriumit të gjuetisë. Zgjatja e moratoriumit deri në vitin 2025 ka si qëllim përmirësimin e gjendjes së llojeve të faunës së egër. atsh
- Advertisment -