FA drejt Kosovës në ndihmë të banorëve të përmbytur

Forcat e armatosura të Shqipërisë janë nisur drejt Kosovës për t’u ardhur në ndihmë banorëve të zonave të përmbytura si pasojë e reshjeve të dendura të shiut. Përmes një video të publikuar në rrjetin e tij social, në Facebook të publikuar nga kryeministri Rama tregohen makinat e ushtrisë që janë dislokuar në Kukës, gati për t’u nisur drejt Kosovës. “Trupat dhe mjetet tona të Forcave të Armatosura, për të mbështetur banorët e disa prej komunave në Kosovë, të cilat janë prekur shumë rëndë nga përmbytjet, si pasojë e reshjeve të jashtëzakonshme”, ka shkruar Rama në Facebook.Ndërkaq, kjo video është shpërndarë edhe nga ministri i Mbrojtjes së Shqipërisë, Niko Peleshi. Ky i fundit shprehet se ushtria është në gatishmëri për të ndihmuar shqiptarët e Kosovës. “Forca dhe mjete nga FA janë dislokuar në Kukës, në gatishmëri për të mbështetur banorët e disa prej komunave në Kosovë, të cilat janë prekur nga përmbytjet si pasojë e reshjeve të dendura ditët e fundit. Me vëllezërit tanë në ditë të mira dhe të vështira”, shkruan Peleshi.Reshjet e shiut kanë shkaktuar përmbytje në disa qytete të Kosovës, ku më e rënduar situata paraqitet në Skenderaj, Mitrovicë, Istog, Pejë e Podujevë. RTSH