INSTAT: Rritet numri i të punësuarve, në bujqësi dhe shërbime

Në tremujorin e tretë të këtij viti, numri i të punësuarve gjithsej u rrit me 3.8 %, krahasuar me tremujorin e tretë të vitit 2021 dhe me 1.6 %, krahasuar me tremujorin e dytë 2022. Referuar INSTAT-it, punësimi u rrit me 3.9 % në sektorin e bujqësisë dhe me 4 % në sektorin e shërbimeve dhe u ul me 2.3 % në sektorin e industrisë. Në tremujorin e tretë të këtij viti, shkalla zyrtare e papunësisë në Shqipëri është 10.6 %. Sipas INSTAT-it, shkalla zyrtare e papunësisë u ul me 0.7 pikë përqindje, në krahasim me tremujorin e tretë të vitit 2021, dhe u ul me 0.5 pikë përqindje, krahasuar me tremujorin e dytë të vitit 2022. Shkalla zyrtare e papunësisë për burrat është 9.9 % dhe për gratë 11.3 %. Krahasuar me të njëjtin tremujor të vitit 2021, shkalla e papunësisë është ulur me 1 pikë përqindje për burrat dhe është ulur me 0.4 pikë përqindje për gratë. Shkalla zyrtare e papunësisë për të rinjtë 15-29 vjeç është 20.5 %. Krahasuar me tremujorin e tretë të vitit 2021, shkalla e papunësisë për të rinjtë, në tremujorin e tretë 2022, është rritur me 0.6 pikë përqindje. Krahasuar me tremujorin e dytë 2022, ky tregues është rritur me 0.3 pikë përqindje.https://ata.gov.al/2022/12/12/instat-rritet-numri-i-te-punesuarve-kontribuan-bujqesia-dhe-sherbimet/