“Shqipja standarde sot”, konferencë shkencore në Prishtinë

Me rastin e 50-vjetorit të Kongresit të Drejtshkrimit të Gjuhës Shqipe, në Prishtinë është mbajtur konferenca shkencore “Shqipja standarde sot”. Eventi shkencor u mbajt në Akademinë e Shkencave dhe të Arteve të Kosovës, në bashkëpunim me Akademinë e Shkencave të Shqipërisë. Akademiku Rexhep Ismajli çeli konferencën, duke thënë se 50 vjet më parë, në Tiranë, u mblodh “forumi më i lartë shkencor në shkallë kombëtare për të diskutuar e për të marrë vendime të rëndësishme për drejtshkrimin e gjuhës së sotme shqipe dhe në një vështrim më të gjerë për çështje që lidhen me normën letrare. Gjatë fjalës së përshëndetjes drejtuar kryetarit të AShAK-ut, akademiku Mehmet Krajës, Kryetarit të Akademisë Shkencave, Skënder Gjinushit dhe të pranishmëve, konferencën shkencore “Shqipja standarde sot” e vlerësoi si një ngjarje me rëndësi themelore në historinë e planifikimit gjuhësor, të Kongresit të Drejtshkrimit të Gjuhës Shqipe. Rezoluta e miratuar në Kongresin e Drejtshkrimit të Gjuhës Shqipe shpallte: “populli shqiptar ka tashmë një gjuhë letrare të njësuar”. Rezoluta bënte thirrje për shtresat e ndryshme që “ta pasurojnë e ta ngrenë gjithmonë më lart gjuhën tonë letrare kombëtare”. U nxorën dekrete për veprimtari konkrete për zbatimin e vendimeve të Kongresit, por akademiku Ismajli tha se të tilla vendime në Kosovë nuk ka pasur, por vendimet e Kongresit janë zbatuar kryesisht mbi bazë të entuziazmit. Me rastin e 50-vjetorit të Kongresit të Drejtshkrimit të Gjuhës Shqipe, Akademia e Shkencave të Shqipërisë dhe ajo e Kosovës, kanë zhvilluar konferenca e takime shkencore.https://ata.gov.al/2022/11/18/shqipja-standarde-sot-konference-shkencore-ne-prishtine/