Kosovo Theatre Showcase

Qendra Multimedia ka njoftuar se Kosovo Theatre Showcase do të nisë nesër dhe do të vazhdojë deri më 29 tetor. Ky event sjell disa nga prodhimet më të mira teatrore të vitit të fundit në Kosovë, para një audience ndërkombëtare prej më se 60 mysafirëve nga mbi 20 vende të Evropës, SHBA-ve dhe Azisë. “Në edicionin e sivjetmë do të jepen 11 shfaqje të prodhuara nga teatro publike e të pavarura të Kosovës, ndër to edhe dy shfaqje mysafire nga Serbia e Bosnja dhe Hercegovina. Në kuadër të programit të sivjetmë do të organizohen edhe panele, lexime e ngjarje të tjera rrjetëzuese”, thuhet në njoftimin e Qendrës Multimedia. ‘Kosovo Theatre Showcase’ është ngjarje vjetore e teatrit e cila çdo vit mbledh në Prishtinë dhe qytete të tjera të Kosovës programues festivalesh, kritikë e profesionistë të tjerë të teatrit. Para publikut shfaqen rreth 10 shfaqje e performanca teatrore nga Kosova, dhe rreth 5 të tjera nga rajoni dhe Evropa ― në një program përcjellës të ‘shfaqjeve mysafire’. E kuruar nga Qendra Multimedia dhe e organizuar në bashkëpunim me teatro e asociacione të tjera teatrore, kjo platformë skenike synon që për çdo vit të sjellë disa nga krijimet më mbresëlënëse dhe të arrira të teatrit në Kosovë. “Mysafirët e showcase-it, përpos që njihen për së afërmi me shfaqje të prodhuara në Kosovë ― një vend me një nga skenat më vitale e vibrante në Ballkan ― kanë mundësinë edhe të ndërveprojnë me krijuesit vendorë të teatrit përmes diskutimeve, paneleve e programeve përcjellëse”, thuhet tutje në njoftim.https://www.rtklive.com/sq/news-single.php?ID=620988