Pedagogët : Bojkoti deri në plotësimin e kërkesave

Pedagogët e universiteteve zhvilluan sot një protestë, ku kërkojnë realizimin e kërkesave të tyre. Protesta është mbajtur në oborret e universiteteve, në ditën e parë të nisjes së vitit të ri akademik. Kreu i Sindikatës së Pedagogëve, Sandër Kovaçi tha se bojkoti do të vijojë deri në plotësimin e kërkesave. “Në çdo universitet të Shqipërisë bëhet fjalë për bojkot. Prania është e lartë. Jemi të vendosur për të vazhduar bojkotin dhe kërkojmë të merren hapa për realizmin e kërkesave”, tha Kovaçi. Përmes një deklarate për mediet edhe Sindikata e Punonjësve të Universiteteve të Shqipërisë bën të ditur vijimin e protestës në mbarë universitet publike të vendit, nga sot e hënë, 17 tetor, nëpërmjet qëndrimit në ambientet e jashtme të çdo fakulteti (oborret e tyre), nga ora 10.00 – 12.00. “Ky qëndrim lidhet me qëllimin tonë për të sensibilizuar institucionet/organet/autoritetet vendimmarrëse të arsimit të lartë në Republikën e Shqipërisë”, thekson deklarata e sindikatës. Gjithashtu përmes një shkrese drejtuar autoriteteve drejtuese të njësive kryesore të IAL-ve Publik kjo sindikatë kërkon mbledhjen e Asamblesë së Personelit Akademik, të quajtur në ketë kërkesë si Asamble e Përgjithshme, duke ftuar në këtë organizëm edhe punonjësit ndihmës akademikë/administrativë dhe përfaqësuesit e Qeverive Studentore, edhe pse këta të fundit nuk janë anëtarë të Asamblesë së Personelit Akademik. Në peticionin e firmosur nga stafi akademik i Fakultetit të Shkencave kërkohet rritja e pagave për pedagogët dhe stafin ndihmës akademik e administrativ. Në peticion propozohet të arrihet niveli i pagave të universiteteve publike të Kosovës brenda 2 viteve, me rritje 30 % në tetor 2022 dhe 20 % në tetor 2023, rritjen e financimit për kërkimin shkencor që të jetë të paktën 0.3 % e GDP, më 2023.http://ata.gov.al/2022/10/17/pedagoget-proteste-kovaci-bojkoti-deri-ne-plotesimin-e-kerkesave/