Qeveria shqiptare do të përjashtojë nga TVSH-ja në import energjinë elektrike të destinuar për t’u shitur nëpërmjet Bursës Shqiptare të Energjisë (ALPEX). Sipas draft paketës të siguruar nga ATSH thuhet se në paketën fiskale që MFE propozon për t’u zbatuar për vitin 2023, parashikohet që përgjegjësia për pagesën e TVSH-së, t’i kalojë personit të tatueshëm, për të cilin kryhet furnizimi me energji elektrike, nëpërmjet mekanizmit të revers charge (autongarkesës). ALPEX parashikohet të nisë funksionimin operacional në fund të muajit nëntor të këtij viti. Bursa Shqiptare e Energjisë Elektrike, e njohur me emrin e saj tregtar ALPEX, u themelua më 5 tetor 2020, me nënshkrimin në Prishtinë të marrëveshjes mes administratorit të OST, Skerdi Drenova dhe kryeshefit ekzekutiv të Operatorit të Sistemit, Transmisionit dhe Tregut të Kosovës, Ilir Shala. Përmes ALPEX-it, pritet të garantohet më shumë transparencë dhe konkurrencë në tregun e energjisë elektrike, si dhe shfrytëzim më efikas i kapaciteteve ndërkufitare.http://ata.gov.al/2022/10/13/paketa-fiskale-2023-tvsh-zero-per-energjine-e-tregtuar-permes-alpex/
- Advertisment -