Gjatë dy ditëve të panairit “Botime albanologjike”, edicioni i parë, Akademia e Studimeve Albanologjike ekspozoi në Prishtinë prurjet e viteve të fundit në fushat e historisë, arkeologjisë, antropologjisë kulturore dhe studimit të artit, gjuhësisë e letërsisë. Valter Memisha, zëvendësrektor i ASA-s bëri një prezantim të hollësishëm të botimeve më përfaqësuese për secilën fushë albanologjike. Në ditën e dytë, u promovua monografia “Dardanët” (ASA, 2022) i prof. dr. Luan Përzhitës. Referuan prof. dr. Memisha, prof. dr. Aurel Plasari dhe prof. dr. Arben Hajdari. Specialist i arkeologjisë, pranë Universitetit të Prishtinës, Arben Hajdari e vlerësoi “Dardanët”, si një punë e gjatë kërkimore shkencore në biblioteka dhe terren, bazuar në burime shteruese historike dhe arkeologjike, si një libër me vlerë për profesionistët e fushës dhe për studentët e mësimdhënësit, të cilët “do të gjejnë të sintetizuar, me mjaft kujdes, të dhëna mbi ecejaket e kësaj hapësire gjeografike nga parahistoria deri në mesjetë”. Në këtë takim ka qenë i pranishëm edhe akademiku Rexhep Qosja. Programi ka vijuar me prezantimet e botimeve të Institutitit Albanologjik të Prishtinës dhe Institutit të Trashëgimisë Shpirtërore e Kulturore të Shqiptarëve, Shkup.http://ata.gov.al/2022/10/06/panairi-botimet-albanologjike-ne-prishtine-promovon-botimet-e-asa/
- Advertisment -