Qendra e NanoAlb pritet të përfundojë brenda 2023-shit

Pjesëmarrësit e Konferencës Ndërkombëtare të Trendeve në Nanoteknologji (TNT2022), pas prezantimit të punimeve të tyre shkencore kanë vizituar kantierin e qendrës së NanoAlb në Kamëz. Gjatë vizitës në kantier ishin të pranishëm Kryetari i Akademisë së Shkencave, Skënder Gjinushi, Frida Krifca, ministre e Bujqësisë, bashkëkryetar i konferencës, Arben Merkoçi dhe Rektori i Universitetit Bujqësor të Tiranës Fatbardh Sallaku. Ishin të pranishëm edhe drejtues të Qendrës së NanoAlb në Akademinë e Shkencave të Shqipërisë, Majlinda Vasjari dhe Bashkim Ziberi (Universiteti i Tetovës, Maqedonia e Veriut), të cilët i njohën pjesëmarrësit e kësaj konference me punën e bërë deri tani dhe me perspektivat e qendrës NanoAlb, si dhe të bashkëpunimit me shkencëtarët e vendeve të tjera të botës nëpërmjet kësaj qendre. Krifca tha se Ministria e Bujqësisë do të mbështesë Akademinë e Shkencave dhe Universitetin Bujqësor të Tiranës në punën kërkimore shkencore, duke pasur në vëmendje aplikimin e nanoteknologjisë në bujqësi. Ministrja e Bujqësisë tha se ndërtimi i plotë i kësaj qendre pritet të përfundojë brenda vitit 2023. Në çeljen e Konferencës Ndërkombëtare të Trendeve në Nanoteknologji (TNT2022), Kryeministri i Shqipërisë Edi Rama premtoi mbështetjen nga qeveria shqiptare dhe tha se “Nanoteknologjia në Shqipëri, do të financohet 1.5 mln euro në vit”. Konferenca Ndërkombëtare e Trendeve në Nanoteknologji (TNT2022) do të vijojë punimet deri më 7 tetor 2022.http://ata.gov.al/2022/10/05/qendra-e-nanoalb-pritet-te-perfundoje-brenda-2023-shit/