Protestat në Iran, udhëheqësi Khamenei fajëson SHBA dhe Izraelin: Po nxisin trazira

Udhëheqësi suprem i Iranit ka fajësuar SHBA-në dhe Izraelin për protestat anti-qeveritare që kanë përfshirë vendin, në komentet e tij të para publike mbi trazirat. Ajatollah Ali Khamenei tha se “trazirat” ishin “nxitur” nga armiqtë e mëdhenj të Iranit dhe aleatët e tyre dhe pretendoi se Kuranet ishin djegur. Ai u bëri thirrje gjithashtu forcave të sigurisë që të jenë të gatshme për t’u marrë me trazirat e mëtejshme. Protestat, sfida më e madhe ndaj sundimit të tij për një dekadë, u nxitën nga vdekja në paraburgim e një gruaje. Mahsa Amini, 22 vjeç, ra në koma disa orë pasi u arrestua nga policia e moralit më 13 shtator në Teheran për dyshimin se kishte thyer ligjin e rreptë që u kërkon grave të mbulojnë flokët me një hixhab ose shami. Ajo vdiq tre ditë më vonë. Familja e saj ka pretenduar se oficerët e kanë rrahur me shkop dhe e kanë goditur në kokë me një nga automjetet e tyre. Gratë kanë udhëhequr protestat që filluan pas funeralit të Amini, duke tundur shamitë e tyre në ajër ose duke u vënë flakën atyre me thirrjet “Grua, jetë, liri” dhe “Vdekje diktatorit”.https://lajme.rtsh.al/artikull/protestat-ne-iran-udheheqesi-khamenei-fajeson-shba-dhe-izraelin-po-nxisin-trazira