Qarku i Shkodrës po përballet me 11 vatra zjarri aktive. Prefektja e Shkodrës, Majlinda Angoni, u shpreh sot se, “temperaturat e larta që po shoqërojnë stinën e verës, kanë rritur mundësinë për rënie të zjarreve në pyje e kullota, duke shtuar këtu problematikën e zjarreve të qëllimshme të shkaktuara nga pakujdesia apo më shumë edhe nga keqdashja e banorëve të vetë këtyre zonave”.
“Në këtë kuadër, inkurajoj publikisht, Drejtorinë Vendore të Policisë Shkodër, të marrë të gjitha masat për gjetjen dhe kapjen e autorëve të vënies së zjarreve dhe vënien e tyre para përgjegjësisë”, theksoi ajo në një postim në rrjetet sociale. “Gjatë gjithë muajit korrik edhe në vazhdim, Sektori i Emergjencave Civile pranë Prefekturës Shkodër, ka qenë dhe do të vijojë të jetë në gatishmëri të plotë për të dhënë mbështetjen e pakursyer si autoriteti koordinues, me qëllim që të mundësojë zvogëlimin e kësaj fatkeqësie natyrore”, shtoi Angoni. Ajo theksoi se, “gjatë gjithë kësaj periudhe përveç koordinimit dhe menaxhimit të situatës së krijuar në mënyrë të pandërprerë me të gjithë bashkitë e qarkut, po monitorojmë çdo ditë edhe në terren dhe po nxisim angazhimin e të gjithë strukturave të marrin përgjegjësitë e tyre në këtë drejtim”.https://ata.gov.al/2022/08/08/angoni-qarku-i-shkodres-po-perballet-me-11-vatra-zjarri-aktive/
