Blegtorë e bletarë që nuk janë shpallur fitues në thirrjen e parë të Skemës Kombëtare 2022, kanë një mundësi të dytë, për të përfituar subvencion nga fondi shtesë i qeverisë. Eranda Selmanaj, drejtore e Agjencisë për Zhvillimin Bujqësor dhe Rural (AZHBR) tha se, qeveria ka rritur me 1.2 miliardë lekë fondin në mbështetje të fermerëve, përmes Skemës Kombëtare të vitit 2022. Në një intervistë për mediet Selmanaj, bëri të ditur se, “nga buxheti tashmë i alokuar 3.7 miliardë me prioritet janë edhe sektorët e bletarisë dhe blegtorisë, pasi kemi pasur shumë kërkesa në aplikime”. Sipas saj, do të rialokohet një buxhet që do merret nga masat e tjera për këta sektorë dhe do të rritet financimi. “Blegtorët dhe bletarët do të njoftohen, për ata që do të jenë pjesë e vijës së financimit”, tha Selmanaj, teksa vuri në dukje se, “risia për këtë shtesë buxheti ka fokus dhe prioritet mbjelljen e grurit dhe mbështetjen me naftë për peshkatarët”. “Mbjellja e grurit subvencionohet me 30 mijë lekë/ha për fermerët që do aplikojnë. Gjithashtu për herë të parë mbështesim me naftë peshkatarët, ku do financohet 40 lekë/litër si pagesë shtesë për të ulur kostot”, tha Selmanaj.https://ata.gov.al/2022/08/02/1-2-miliarde-shtese-per-bujqesine-selmanaj-perfitojne-edhe-blegtore-e-bletare/
- Advertisment -