Bashkimi Evropian e pranoi Shqipërinë si anëtare të SEPA në nëntor të vitit të kaluar dhe, sipas Sejkos, Banka e Shqipërisë ka një plan dhe po bashkëpunon ngushtë me Ministrinë e Ekonomisë për përmirësimin e sistemeve të pagesave digjitale në vend.
“Ne kemi një plan, qeveria dhe Banka e Shqipërisë është duke punuar për digjitalizimin, për sistemin e pagesave, për formalizimin e ekonomisë shqiptare. Këtu bën pjesë edhe SEPA. Ne jemi bërë anëtarë të SEPA-s, në nëntor të vitit të kaluar. Ndërsa ka edhe sisteme të tjera për përmirësimin e sistemit të pagesave. Zhvillimet në sistemet e pagesave, në bashkëpunim me Ministrinë e Ekonomisë, shkojnë paralelisht. Presim reduktim të parasë cash dhe rritje të digjitalizimit. Por edhe ulje të konsiderueshme të kostove”, theksoi ai.
Ky zhvillim pritet të rrisë efikasitetin dhe sigurinë e pagesave elektronike, duke përmirësuar kështu mjedisin financiar dhe biznesin në Shqipëri.
