Parku Kombëtar “Shebenikë-Jabllanicë” është një ndër destinacionet turistike për vizitorët e natyrës dhe të aventurës. Admininstrata e Zonave të Mbrojtura Elbasan po vendosë në të gjithë parkun tabela orientuese për vizitorët. “Shtegu i Llangës- Shpella e Akullit-Fushe Studën. Është pothuaj në përfundim puna për plotësimin me të gjithë informacionin e nevojshëm përgjatë 10 km të shtegut, i cili është në shërbim të vizitorëve vendas e të huaj”, bën të ditur ADZM Elbasan. Ky shtegu përshkohet nga bukurite e pyjeve të ahut dhe kullotave malore të Letmit, duke e bërë atë një nga destinacionet më të bukura malore në Parkun Kombëtar “Shebenik”. Parku Kombëtar i Shebenikut ka mjaft monumente natyrore të shpallura apo jo, që mund të vizitohen nga turistët dhe studiuesit. Me interes është Kisha e Kosharishtit e ndërtuar në një shpellë me figura e mbishkrime që nga shek. II para erës sonë, që duhet të jetë gjithashtu pjesë e guidës nëse doni të vizitoni Parkun Kombëtar të Shebenikut. Kjo shpellë-kishë është e vendosur në një shkëmb në lartësi rreth 70 metra nga niveli i lumit të Qarrishtës, ku janë pikturuar Shenjtorja Mari dhe dishepujt gjatë një ceremonie. Shumë i rëndësishëm fakti që ngjyrat në këto piktura nuk janë zhdukur dhe qëndrojnë ende të gjalla. Do të gjeni në Shebenik liqenet karstike, liqenin e Fushë-Studnës, Vlaskën, Fushën e Dorëzit, Bredhin e Fushë-Kuqes, Rrapin e Taksimit, Shkallën e Skënderbeut, Gurrën e Ariut e shumë zona të tjera që presin vizitorë.
https://ata.gov.al/2022/07/07/parku-kombetar-i-shebenikut-tabela-informuese-per-vizitoret/
