Ambasadorët e BE-së në Bruksel miratuan dje kredinë me vlerë 35 miliardë euro (39 miliardë dollarë) për Ukrainën – të siguruara nga fitimet e aseteve të ngrira ruse.
Këshilli i Bashkimit Evropian – organi i BE-së që përfaqëson 27 shtetet anëtare – publikoi vendimin.
Presidentja e Komisionit Evropian, Ursula von der Leyen njoftoi paketën e huasë gjatë një vizite në Kiev në shtator.
“Sulmet e pamëshirshme të Rusisë nënkuptojnë se nevojitet mbështetje e mëtejshme”, tha Von der Leyen.
Plani i presidentes së komisionit për një kredi të BE-së për Ukrainën – pa përfshirjen e Shteteve të Bashkuara të Amerikës – fillimisht kërkonte miratimin e shumicës së cilësuar të vendeve të BE-së.
Plani i komisionit ishte arritja e një shumice të cilësuar për kredinë e Ukrainës për të shmangur një veto nga Hungaria. Kredia ende duhet të miratohet nga Parlamenti Evropian.
Paketa prej 35 miliardë eurosh e Bashkimit Evropian është një hua prej 50 miliardë dollarësh për Ukrainën e shpallur nga shtatë vendet kryesore të industrializuara perëndimore (G7) në qershor.
Shtetet anëtare të BE-së Gjermania, Italia dhe Franca janë vende të G7-ës. Shuma e mbetur e kredisë së G7 për Ukrainën do të mblidhet nga vendet e tjera të G7, Kanadaja, Japonia dhe Britania e Madhe.
Rreth 210 miliardë euro në asetet shtetërore ruse të mbajtura nga institucionet financiare në bllok janë aktualisht të ngrira si pjesë e sanksioneve të BE-së, sipas shifrave të komisionit.
Këto asete pritet të gjenerojnë rreth 2,5 deri në 3 miliardë euro interes në vit, tha komisioni.
Sanksionet e BE-së për ngrirjen e këtyre aseteve ruse rinovohen çdo gjashtë muaj.
Sipas rregullave të BE-së, ngrirja e fondeve duhet të vendoset unanimisht.
SHBA-ja, vendi i mbetur i G7, do të pranonte të merrte pjesë në kredinë e G7 vetëm nëse asetet ruse ngriheshin për 36 muaj, sesa periudha aktuale gjashtëmujore.
Hungaria është kundër kësaj dhe ka përdorur veton për të bllokuar zgjatjen për një kohë më të gjatë se periudha gjashtëmujore.
