50 milionë euro hua nga KfW për mbetjet për 5 zona

Komisioni Parlamentar për Ekonominë dhe Financat miratoi sot marrëveshjen e huas me KfW për programin për menaxhim të qëndrueshëm dhe miqësor me klimën në sektorin e mbetjeve të ngurta. Zëvendësministrja e Infrastrukturës dhe Energjisë, Enkelejda Muçaj e pranishme në komision bëri të ditur se nënshkrimi i kësaj marrëveshjeje do të mundësojë financimin e ndërtimit të infrastrukturës së menaxhimit të integruar të mbetjeve, sipas nevojave të identifikuara gjatë hartimit të studimit të fizibilitetit për zonat e mbetjeve Dibër, Tiranë-Durrës, Berat, zona veriore e rajonit Vlorë, Korçë. “Ky projektligj synon ratifikimin e marrëveshjes së huasë me KFW për programin për menaxhim të qëndrueshëm dhe miqësor me klimën në sektorin e mbetjeve të ngurta, në vlerën 50 milionë euro. Objektivi i përgjithshëm i këtij programi është dhënia e kontributit për një menaxhim të qëndrueshëm të mbetjeve të ngurta, nëpërmjet investimeve në infrastrukturën e mbetjeve të ngurta dhe mbështetjen institucionale për dhënien e një shërbimi të përmirësuar në zonat e ndryshme të mbetjeve”, tha ajo. Muçaj vuri në dukje se realizimi me sukses i programit do të sjellë në mënyrë të drejtpërdrejtë përmirësimin e menaxhimit të integruar të mbetjeve në rajonet e përfshira. Aktualisht, ekzistojnë qendrat e menaxhimit të mbetjeve për zonat e mbetjeve Tiranë-Durrës (Sharra, Tiranë), Shkodër – Lezhë (Bushati, Shkodër), Vlora – Jug (Bajkaj, Sarandë) dhe Korçë (Maliq), të cilat janë ndërtuar, duke plotësuar 3 kushtet teknike e mjedisore. Gjithashtu, është ndërtuar dhe është në funksionim, impianti për trajtimin e mbetjeve dhe prodhim energjie në Elbasan, është në proces finalizimi ndërtimi i impiantit për trajtimin e mbetjeve dhe prodhim energjie në Fier, si dhe është në proces finalizimi ndërtimi i qendrës së menaxhimit të mbetjeve për zonën e mbetjeve Vlorë – Veri në Sherishtë, Vlorë. Zv/ministrja Muçaj tha se nëpërmjet financimeve hua të kësaj marrëveshjeje, parashikohet të financohet furnizimi i makinerive dhe pajisjeve për grumbullimin dhe transportin e mbetjeve, si dhe për pastrimin e bashkive, si kosha dhe kontenierë për depozitimin e mbetjeve, makineri për grumbullimin dhe transportin e mbetjeve, makineri për pastrimin e rrugëve, makineri për pastrimin e plazheve, si dhe ndërtimi i qendrave të menaxhimit të mbetjeve, duke përfshirë impiantin e ndarjes së mbetjeve të ngurta nga ato të riciklueshme, landfill për mbetjet e ngurta urbane, landfill për mbetje inerte, stacione transferimi të mbetjeve; rehabilitim dhe mbyllje e venddepozitimeve ekzistuese të mbetjeve. atsh