43.1 miliardë për përballimin e efekteve të krizës

Ndryshimet në buxhetin e këtij viti dhe politikat e ndjekura nga qeveria në përgjigje të krizës globale e ardhur nga invazioni rus në Ukrainë janë dy nga pikat për të cilat opozita dhe mazhoranca po debatojnë në seancën e sotme plenare. Opozita akuzoi qeverinë se po i kanalizon fondet për klientët e saj dhe nuk po i adreson drejt shtresave në nevojë të prekura nga rritja e çmimeve për produktet bazë deri në 25 %. Deputeti i PD-së, Edmond Spaho deklaroi se rritja me 7 % e pagave nga ana e qeverisë nuk mbulon koston e shtuar nga rritja e çmimeve prej 15-25 %. “Kjo është aritmetikë e thjeshtë. Duhet të kuptoni se në ç’kushte po jetojnë njerëzit pas gjithë këtyre “sukseseve “që ju përmendni. Në paketën e parë dhatë 3-fish atyre të rrugëve që i keni klient dhe 1-fish qytetarëve”, tha Spaho. Por, ministrja e Financave dhe Ekonomisë deklaroi se mbështetja përmes paketave të solidaritetit gjatë këtij viti për qytetarët dhe biznesin për përballimin e efekteve të krizës ka shkuar 43.1 miliardë lekë“, tha ministrja. Sipas saj, këto masa janë përshëndetur edhe nga raporti i fundit i FMN-së. “Në raportin e fundit të FMN-së qeveria përshëndetet për mënyrën se si qeveria ka përballuar jo vetëm këtë krizë, por edhe ato të kaluarat, duke vijuar me reformat strukturore dhe investimet që kanë sjellë e sjellin zhvillim sot dhe në vitet në vijim”, u shpreh ministrja. Ajo theksoi se masat mbështetëse kanë targetuar shtresat më në nevojë, si pensionistët dhe ata me pagesë papunësie. Për pensionistët, ministrja rikujtoi se ata përfituan indeksim me 9.5 %, ndërsa pagesa për papunësinë dhe ndihma ekonomike u rrit me 10 %.http://ata.gov.al/2022/12/22/ibrahimaj-43-1-miliarde-leke-qytetareve-dhe-biznesit-per-perballimin-e-efekteve-te-krizes/