Zgjidhje paqësore të krizës në Niger

Ministrja gjermane e Zhvillimit, Svenja Schulze ka bërë thirrje për një zgjidhje paqësore të krizës së Nigerit përpara vizitës së saj në Afrikën Perëndimore. “Protesta kundër grushtit të shtetit në Niger nuk duhet të nënkuptojë shpalljen e luftës”, tha Schulze për “Neue Osnabrücker Zeitung”. Schulze tha se duhet të sigurohet që zgjedhjet e reja të zhvillohen së shpejti ose presidenti i zgjedhur në mënyrë demokratike, Mohamed Bazoum të mos mbahet më në burg dhe të mos lëndohet. Grushti i shtetit ushtarak në Niger dy javë e gjysmë më parë shkaktoi një krizë rajonale. “Grushti i shtetit ishte mjaft i pazakontë. Nuk ka patur vdekje, kjo e bën më të lehtë gjetjen e rrugëve diplomatike, të cilat janë padyshim të mundshme”, tha Schulze. Schulze pritet të mbërrijë në Mauritani për të nisur një udhëtim katërditor në Afrikën Perëndimore. Të mërkurën, ajo do të vizitojë Nigerin, ku do të zhvillojë bisedime me përfaqësuesit e Komunitetit Ekonomik të Shteteve të Afrikës Perëndimore (ECOWAS), të cilin Nigeri e kryeson. Ata do të diskutojnë gjithashtu se si Gjermania mund të mbështesë përpjekjet për të gjetur një zgjidhje paqësore në Niger. ATSH