Zelensky bën thirrje për sanksione të mëtejshme ndaj Rusisë

Presidenti ukrainas, Volodymyr Zelensky i ka bërë thirrje Perëndimit për sanksione të reja kundër Moskës, në kuadër të sulmeve ruse raketore në rritje ndaj Ukrainës. “Nevojitet një paketë e re sanksionesh evropiane”, tha dje në mbrëmje Zelensky në një videomesazh drejtuar studentëve irlandezë. “Agresioni rus nuk ndalet për një ditë të vetme. Ashtu si gënjeshtrat ruse ndaj botës nuk ndalen kurrë. Prandaj, për të gjitha këto, presioni ndërkombëtar ndaj Rusisë nuk duhet të ndalet për një ditë të vetme”, theksoi Zelensky. Zelensky akuzoi Moskën për shkelje të deklaratës përfundimtare të samitit të G20, në ishullin indonezian Bali, i cili u mbështet edhe nga Rusia, në shumë pika. Deklarata theksoi rëndësinë e së drejtës ndërkombëtare dhe të një sistemi shumëpalësh si garantues i paqes dhe stabilitetit. “Megjithatë, Rusia vazhdon të shkatërrojë marrëdhëniet ndërkombëtare duke pretenduar se po lufton së bashku me të gjithë të tjerët kundër këtij destabilizimi”, tha ai. “Moska po mobilizon të gjitha burimet e saj për t’u bërë shteti terrorist më i madh në histori”, tha Zelensky. Pavarësisht dallimeve të mëdha të opinioneve, grupi G20 i vendeve kryesore të industrializuara dhe në zhvillim, miratoi një deklaratë përfundimtare në samitin në të cilën shumica dërrmuese e anëtarëve dënuan ashpër luftën ruse kundër Ukrainës.