Sekretarja amerikane e Thesarit, Janet Yellen paralajmëroi për kërcënimin që paraqet mbikapaciteti i Kinës për ekonominë globale. “Mbështetja direkte dhe indirekte e qeverisë aktualisht po çon në kapacitet prodhues që tejkalon ndjeshëm kërkesën e brendshme të Kinës, si dhe atë që mund të përballojë tregu global”, u tha 77-vjeçarja përfaqësuesve të Dhomës së Tregtisë së SHBA në Guangzhou.
“Unë e kuptoj se këto politika mund të drejtohen nga objektivat e zhvillimit të brendshëm. Por mbikapaciteti mund të çojë në vëllime të mëdha eksportesh me çmime të ulëta”, theksoi ajo. Kina po vërshon tregun global me produkte të tilla si panelet diellore dhe bateri. Kjo po shkakton shqetësime në Perëndim, ku kompanitë nuk janë në gjendje të konkurrojnë me produkte të lira nga Lindja e Largët.
Ne kemi parë Kinën të ndjekë praktika të padrejta ekonomike, duke përfshirë vendosjen e pengesave për aksesin për firmat e huaja dhe marrjen e veprimeve shtrënguese kundër kompanive amerikane”, shtoi ajo. Yellen është në Kinë deri të martën e ardhshme për bisedime me zyrtarë të lartë të qeverisë. “Presidenti Biden dhe unë e kundërshtojmë me vendosmëri idenë se SHBA duhet të shkëputet nga Kina.
Një ndarje e plotë ekonomike nuk është as praktike dhe as e dëshirueshme, siç kanë pohuar si SHBA ashtu edhe Kina në deklaratat publike pas takimeve tona dypalëshe të nivelit të lartë”, tha ajo.
