”Yara Birkeland” transportuesi i kontejnerëve me zero emisione dhe pa ekuipazh

Anija e parë me emetime zero dhe pa pilot është nisur dhe ka përfunduar një test të suksesshëm, njoftoi kompania norvegjeze ”Yara International”, e cila e ndërtoi atë, shkruan faqja focus.it. Nëse përpunimi i të dhënave e konfirmon këtë, udhëtimi i parë i vërtetë i biznesit pritet të bëhet deri në fund të vitit 2021 dhe do të lidhë dy qytete në Norvegji. ”Yara International” është një kompani norvegjeze e themeluar në vitin 1905 për të luftuar, në atë kohë, urinë në rritje që po ndodhte në Evropë. Kompania u specializua në sektorë të ndryshëm dhe ishte e para në botë që krijoi një pleh azotik, i cili ndihmoi në ndryshimin sasior të bujqësisë dhe që aktualisht mbetet aktiviteti i saj kryesor tregtar. Përveç kësaj, ”Yara” studion gjithashtu zgjidhje për reduktimin e emetimeve dhe praktikat e qëndrueshme bujqësore. ”Yara Marine Technologies” synon të transportojë mallra nga deti duke minimizuar ndotjen. Në vitin 2017 kompania filloi projektin e një anije autonome, krejtësisht elektrike. Sot, ”Yara Birkeland”, e quajtur sipas fizikantit norvegjez Kristian Birkeland, i cili zbuloi se si të rregullonte azotin atmosferik në formën e oksidit, është ankoruar në portin e Hortenit. ”Yara Birkeland”, 80 metra e gjatë dhe 15 e gjerë, do të jetë në gjendje të udhëtojë me një shpejtësi prej 13 nyje (rreth 24 kilometra në orë) dhe do të jetë në gjendje të transportojë 60 kontejnerë të ngarkuar plotësisht.