Në nder të Ditës Kombëtare të Rinisë, i Ngarkuari me Punë David Wisner dhe Shefi i Zyrës së Marrëdhënieve me Publikun Chad Twitty iu bashkuan të rinjve shqiptarë nga i gjithë vendi, pjesëmarrës në programin e ambasadës Youth Lead 2. Në njoftimin e saj në rrjetet sociale, Ambasada e SHBA në Tiranë bën të ditur se “Youth Lead bën bashkë të rinj nga qytetet që shëtiti turi ynë me autobusin e Këndit Amerikan Lëvizës për të krijuar rrjetin e tyre dhe për të adresuar çështje të komunitetit local”. Sipas njoftimit, “gjatë diskutimit në Durrës, i Ngarkuari me Punë Wisner dëgjoi për përvojat e tyre, teksa të rinjtë i treguan planet për të ardhmen, si dhe projektet e tyre në komunitet. Zoti Wisner theksoi rëndësinë e një rinie të angazhuar për të ardhmen e Shqipërisë dhe nënvizoi ndikimin e rëndësishëm që të rinjtë kanë në një vend, ashtu siç bota e pa në 8 dhjetor 1990”, njofton Ambasada e SHBA. “Ai nxiti të rinjtë të vazhdojnë përpjekjet e tyre për të krijuar rrjete aktive rinore në mbarë Shqipërinë që adresojnë çështje lokale dhe përmirësojnë komunitetet e tyre”, përfundon njoftimi i Ambasadës së SHBA në Tiranë.
