Misioni i parë amerikan i uljes në Hënë në dekada nis me NASA-n, sipas CNN. Një raketë e re ka nisur fluturimin duke bartur atë që mund të jetë zbarkimi i parë komercial që prek Hënën si edhe misioni i parë i uljes hënore nga SHBA që nga viti 1972. Raketa ”Vulcan Centaur”, një model i pafluturuar kurrë më parë dhe i zhvilluar nga ”United Launch Alliance”, një sipërmarrje e përbashkët nga ”Boeing” dhe ”Lockheed Martin”, mori jetë në Stacionin e Forcave Hapësinore Cape Canaveral në Florida në orën 02:18 të mëngjesit të sotëm. Mjeti lëshues fluturoi në hapësirë për gati një orë, duke shpenzuar karburantin e tij ndërsa u shkëput nga graviteti i Tokës dhe dërgoi zbarkuesin hënor, të quajtur ”Peregrine”, në rrugën e tij për në Hënë. Vetëm pas orës 03:00, anija kozmike ”Peregrine” u nda nga raketa dhe filloi udhëtimin e saj të ngadaltë drejt sipërfaqes hënore. Nëse gjithçka shkon sipas planit, zbarkuesi mund të prekë Hënën më 23 shkurt. Kompania me qendër në Pittsburgh ”Astrobotic Technology” zhvilloi ”Peregrine” sipas një kontrate me NASA-n. “Është një ëndërr … Për 16 vjet ne kemi kërkuar për këtë moment sot”, tha CEO i ”Astrobotic”, John Thornton gjatë një transmetimi në internet të nisjes. ”Gjatë rrugës, ne patëm shumë sfida të vështira që duhej t’i kapërcenim dhe shumë njerëz dyshuan tek ne gjatë rrugës. Por, ekipi ynë dhe njerëzit që na mbështetën besuan në mision dhe krijuan këtë moment të bukur që po shohim sot”, shtoi ai. Agjencia hapësinore pagoi ”Astrobotic” 108 milionë dollarë për të zhvilluar ”Peregrine” dhe për të fluturuar eksperimentet shkencore të NASA-s në sipërfaqen hënore. Gjithashtu në bordin e raketës ”Vulcan Centaur”, e paketuar veçmas nga zbarkimi ”Peregrine”, ishte një ngarkesë tjetër nga kompania e varrimit hapësinor ”Celestis”. Objekti, në një mision të quajtur ”Enterprise Flight”, përmban 265 kapsula me mbetje njerëzore si dhe mostra të ADN-së nga ish-presidentët e SHBA John F. Kennedy, George Washington dhe Dwight Eisenhower.
