Norvegjia, Suedia dhe Finlanda kanë rënë dakord të krijojnë një korridor transporti ushtarak që kalon në veri të secilit prej tre vendeve, njoftoi sot kryeministri norvegjez.
”Kjo marrëveshje përbën një hap të rëndësishëm për këto tre vende, tashmë të gjitha anëtare të NATO-s”, tha Jonas Gahr Store.
Finlanda dhe Suedia hoqën dorë nga dekada të mosangazhimit ushtarak pas pushtimit rus të Ukrainës në shkurt 2022, me Finlandën që iu bashkua Aleancës Atlantike në prill 2023 dhe Suedia në mars të këtij viti.
“Sot ne ramë dakord për të krijuar një korridor transporti ushtarak përmes Norvegjisë veriore, Suedisë veriore dhe Finlandës veriore”, tha Store pas një takimi me homologun e tij suedez, Ulf Kristersson dhe presidentin finlandez, Alexander Stubb.
“Kjo do të lejojë që personeli dhe pajisjet të transportohen shpejt nga portet norvegjeze në Finlandë nëpërmjet Suedisë”, shtoi kreu i qeverisë.
Arktiku është bërë një rajon strategjik vitet e fundit, me shkrirjen e akullit për shkak të ngrohjes globale duke hapur rrugët e transportit detar dhe duke ofruar perspektiva për shfrytëzimin e depozitave të pasurisë si nafta, gazi dhe mineralet.
Në mars, NATO organizoi gjithashtu manovrat “Nordic Response” në rajon, pjesë e operacionit ”Steadfast”, stërvitja më e rëndësishme ushtarake e nisur nga Aleanca që nga fundi i Luftës së Ftohtë.
Rusia e Vladimir Putinit, nga ana e saj, ka forcuar aftësitë e saj ushtarake në rajon, i cili është shtëpia e flotës së saj të fuqishme veriore.
Qeveria norvegjeze bën me dije në deklaratën e saj për shtyp se ministrat e Mbrojtjes do të udhëheqin punën për organizimin e këtij korridori transporti.
“Së bashku, ata do të identifikojnë pengesat, do të përditësojnë rregulloret dhe legjislacionin e nevojshëm dhe do të investojnë në infrastrukturën e nevojshme për të siguruar lëvizshmëri të shpejtë dhe efektive ushtarake”, thuhet në deklaratë
