Vau i Dejës, hapet gara për ndërtimin e impiantit fotovoltaik lundrues mbi liqen

Banka Europiane për Rindërtim dhe Zhvillim ka njoftuar së fundi një procedurë prokurimi për projektin e impiantit fotovoltaik lundrues mbi liqenin e hidrocentralit të Vaut të Dejës. Banka Europiane për Rindërtim dhe Zhvillim e cila do të mbështesë financiarisht këtë projekt publikoi në faqen e saj detajet ku nënvizoi se data e mbylljes është 22 dhjetori i këtij viti. Objekti i kontratës “Projektimi, ndërtimi dhe funksionimi i impiantit fotovoltaik lundrues 12.9 MW i vendosur në liqenin e HEC-it të Vaut të Dejës” është kërkuar nga kompania SENA Solar Energy of Albania. Në korrik të vitit 2020 KESH-it iu miratua një kredi nga BERZH në mbështetje të projektit të impiantit fotovoltaik Lundrues ku nga totali i kostst prej rreth 14 milionë euro, 9.75 milionë euro janë kredi nga ky institucion financiar ndërkombëtar. Për KESH ky nuk është projekti i parë fotovoltaik që do të zbatohet edhe pse është i pari lundrues. Më herët ishte impianti Fotovoltaik i Qyrsaqit (Hec Vau i Dejës), me kapacitet të instaluar 5.135 MW/p, që filloi zyrtarisht prodhimin më 12 Maj 2022. KESH raportoi pak kohë më parë se për periudhën 3 Mujore (Maj-Korrik), impianti gjeneroi në total 1,623 MWh energji elektrike. E konvertuar në vlerë monetare nëpërmjet optimizimit përfitueshmëria neto arrin në 346,500 Eur, vetëm për këtë periudhë, nënvizonte KESH. Në kuadër të shtimit të diversifikuar të kapaciteteve prodhuese KESH është në fazën kur ka aplikuar për ndërtimin e një impianti tjetër fotovoltaik në Digën e Zadejës po në HEC Vau i Dejës, me fuqi të instaluar të përllogaritur prej 8.25 MW. Diversifikimi i burimeve të Koporatës është nënvizuar se do të sjellë një optimizim më të mirë të kaskadës duke alternuar prodhimin sipas kushteve.https://lajme.rtsh.al/artikull/vau-i-dejes-hapet-gara-per-ndertimin-e-impiantit-fotovoltaik-lundrues-mbi-liqen