Sulmuesi i kombëtares shqiptare të futbollit Myrto Uzuni, ka bërë një paraqitje pozitive fundjavën e shkuar. 27-vjeçari nga Berati ka shënuar një gol të rëndësishme për skuadrën e “Granadas”, në fitoren 3-2 përballë “Mallorcas”, në ndeshjen e vlefshme për javën e tretë të Primera Divizion. Uzuni falë paraqitjes së tij është vendosur në formacionin më të mirë të javës së tretë të “La Ligas”, sipas prestigjiozes spanjolle “Marca”. Uzuni në minutën e 70’ të sfidës mes “Mallorcas” dhe Granadas” arriti të shënojë nga pika e bardhë e 11-të metërshit duke i dhënë tri pikë të rëndësishme skuadrës së tij. Një gol, që është dhe një sinjal mjaft i mirë për kombëtaren shqiptare të futbollit që pritet të jetë e angazhuar këtë fillim shtatori në dy përballje të rëndësishëm kundër Çekisë dhe Polonisë më datat 7-10 shtator, në kuadër të kualifikimeve për Europianin e vitit të ardhshëm. Uzuni, 27 vjeç ishte vendimtar për skuadrën e tij “Granadan” edhe sezonin e shkuar, kur luante në divizionin e dytë spanjoll, duke ndihmuar skuadrën e tij për t’u ngjitur mes më të mirëve. Sulmuesi nga Berati arriti që sezonin e shkuar të shpallej dhe gola shënues duke dërguar 23 herë topin në rrjetë.
- Advertisment -