Ushtria e Kosovës garanton mbrojtjen e territorit të Republikës

Ministri i Mbrojtjes së Kosovës, Armend Mehaj ka reaguar ndaj deklaratës së presidentit të Serbisë, Aleksandër Vuçiç. Mediat serbe raportuan se Vuçiç ka urdhëruar ushtrinë të vendoset në gjendje gatishmërie për t’i shkatërruar “dronët e armikut”, të cilët kinse vëzhguan pozicionet e ushtrisë serbe. Mehaj tha se këto pretendime janë plotësisht të pavërteta dhe tentim për destabilizimin e Republikës së Kosovës përmes ngjalljes së frikës tek komuniteti serb. “Në lidhje me deklarimin e Presidentit të Serbisë, Aleksandër Vuçiq, për gjoja lëvizjen e dronëve të panjohur nga territori i Republikës së Kosovës mbi vendbanimin e Rashkës, njoftojmë qytetarët se këto pretendime janë plotësisht të pavërteta, dhe çfarëdo diskursi i tillë është vetëm pretekst për rritjen e numrit të trupave të ushtrisë serbe përreth kufirit me Republikën e Kosovës, si mjet për përhapjen e një gjendje paniku mbi qytetarët e të dyja shteteve; Fillimisht për tentim kthimin e vëmendjes në një temë që nuk është më brengë e qytetarëve të Serbisë, të cilët tashmë kanë pranuar realitetin e ri të shtetit të Kosovës, dhe pakënaqësitë e tyre kanë të bëjnë më tepër me mirëqenien e tyre nën udhëheqjen e Vuçiç sesa me rezultatet e dialogut”, deklaron ministri. Mehaj ka theksuar se Ushtria e Republikës së Kosovës do të garantojë mbrojtjen e të gjithë shtetasve brenda territorit të Republikës së Kosovës dhe se çdo veprim është në koordinim të plotë me aleatët në mbrojtje të integritetit territorial dhe vlerave demokratike evropiane. “Tentim destabilizimin e Republikës së Kosovës përmes ngjalljes së frikës tek komuniteti serb, qytetarët tanë, për gjoja masat e dhunshme që priten të ndërmerren nga ana e institucioneve të qeverisë, tek të gjithë ata që përdorin targa ilegale të Serbisë, e të cilat u’a rikujtojmë se janë të tilla, ilegale, pasi janë në kundërshtimin me marrëveshjen e derivuar nga dialogu në mes të dyja palëve, si dhe në kundërshtim me vendimin e qeverisë së Republikës së Kosovës, të datës 28.10.2022, në të cilin është vendosur që procesi i regjistrimit të këtyre mjeteve në targa RKS të bëhet i shkallëzuar në tre faza, deri në përmbylljen e këtij procesi legal dhe legjitim me datë 21 prill 2023. Duam të sigurojmë të gjithë qytetarët e Republikës së Kosovës se ashtu siç janë njoftuar edhe më parë nga Ministria e Punëve të Brendshme, ky proces ka për synim ligjshmërinë në shtetin tonë, rritjen e sigurisë në trafik, dhe nuk është i drejtuar ndaj asnjë etnie të caktuar”, shprehet Mehaj. Ai shton se “të gjithë qytetarët që kanë pasur në shfrytëzim tabela të tilla deri me datën 31 mars 2023, do të kenë mundësi të përfitojnë nga lehtësirat për regjistrim të mjeteve nga targa ilegale në targa RKS, duke përfshirë: taksat doganore, taksën administrative në Qendrën e Regjistrimit të Automjeteve, tarifën për targa dhe tarifën për pajisje me certifikatë të regjistrimit të Automjetit”. Sipas tij, respektimi i këtyre masave do të sigurohet nga ana e Policisë së Republikës së Kosovës, si rregulluese e trafikut, ndërsa ushtria e Republikës së Kosovës, padyshim do të garantoj mbrojtjen e të gjithë shtetasve brenda territorit të Republikës së Kosovës. “Çdo veprim i yni është në koordinim të plotë me aleatët tanë, në mbrojtje të integritetit territorial dhe vlerave demokratike evropiane”, deklaron Mehaj.http://ata.gov.al/2022/11/02/mehaj-ushtria-e-kosoves-garanton-mbrojtjen-e-territorit-te-republikes/