UNECE, projekt për transformimin e minierave të mbyllura të qymyrit

Agjencia Kombëtare e Burimeve Natyrore (AKBN) po merr pjesë në konferencën e Komitetit të Energjive të Qëndrueshme, organizuar nga UNECE, në Gjenevë, Zvicër. Në sesionin e 32-të të komitetit u diskutua mbi projektin “Transformimi i minierave të qymyrit të mbyllura në përdorimin e energjisë së pastër”, i cili do të implementohet gjatë muajit shtator 2023, me objektiv ndryshimin e sfondit të energjisë drejt sigurisë energjetike, si një prioritet zëvendësimin e lëndëve djegëse fosile me burime të pastra të energjisë. Drejtori i AKBN-së, Adrian Bylyku, në këtë sesion paraqiti situatën minerare në vend. Bylykbashi paraqiti disa nga problematikat e materialeve kritike në vendin tonë, duke paraqitur politikat dhe ndikimet për zvogëlimin e riskut në zinxhirin e lëvizjes dhe stokimit të tyre. Po ashtu u ndal në situatën e minierave të braktisura të qymyrit, sfidat me të cilat ballafaqohet industria e qymyrit si dhe rivënia në punë e ish minierave të qymyrgurit. Kreu i AKBN-së, po ashtu prezantoi politikat e zhvillimit të energjisë së pastër në zonat e braktisura të minierave të qymyrit, si dhe mbështetjen e ngushtë me Divizionin e Energjisë së Qëndrueshme të UNECE, në dy projekte, në kuadër të programit të rregullt të bashkëpunimit teknik të UNECE. Ai prezantoi edhe projektin e ri që do të zhvillojë AKBN-ja dhe grupi i ekspertëve të UNECE për metanin dhe tranzicionin e drejtë të minierave të qymyrit, për hartimin e gatishmërisë së Shqipërisë për një tranzicion të gjelbër dhe të drejtë në zonat e saj pas minierave të qymyrit. Objektivi i projektit të ri me UNECE-n është të identifikojë barrierat rregullatore, sociale, teknike dhe financiare që vendi do t’i duhet të adresojë për të qenë në gjendje të rikuperojë dhe ripërdorë me sukses zonat e tij pas minierave të qymyrit në përputhje me parimet e ekonomisë së gjelbër dhe të tranzicionit të drejtë. Ai gjithashtu do të identifikojë elementët që janë të nevojshëm për të mundësuar fillimin dhe për të siguruar përparimin në rikuperimin dhe ripërdorimin e tokës së kontaminuar.