Mijëra banorë të rajonit kufitar lindor të Ukrainës, Kharkiv, po evakuohen në vend të sigurt mes operacioneve sulmuese aktuale të Rusisë. “Rreth 4000 banorë janë larguar nga zona gjatë dy ditëve te fundit”, shkroi sot guvernatori rajonal Oleh Syniehubov në Telegram. “Shumë prej tyre kanë mundur të qëndrojnë me miqtë dhe të afërmit, ndërsa për të tjerët është ofruar strehim”, tha ai. Syniehubov publikoi gjithashtu foto të njerëzve që ishin mbledhur në pikat e grumbullimit me bagazhe dhe me kafshë shtëpiake. Më shumë se dy vjet pasi Rusia nisi pushtimin në shkallë të gjerë në vendin fqinj. Kjo është pjesërisht për shkak të vonesave të fundit në furnizimet me pajisje ushtarake dhe municione amerikane. Trupat ruse nisën një ofensivë në rajonin kufitar drejt Kharkivit të enjten në mbrëmje, duke shkaktuar frikën e një operacioni ushtarak për të kapur qytetin e dytë më të madh të Ukrainës. Ministria e Mbrojtjes e Rusisë tha se disa fshatra në kufi me Ukrainën pranë qytetit të Vovchansk ishin pushtuar. Moska njoftoi sot se katër fshatra të tjerë ishin marrë nën kontroll.
