Udhëheqësit e Koresë së Jugut, Kinës dhe Japonisë do të takohen javën e ardhshme në Seul për bisedimet e para tripalëshe pas më shumë se katër vjetësh, tha sot zyra presidenciale e Koresë së Jugut. Presidenti i Koresë së Jugut, Yoon Suk Yeol, kryeministri japonez Fumio Kishida dhe kryeministri kinez Li Qiang do të takohen të hënën në kryeqytetin e Koresë së Jugut. Pritet të ketë një deklaratë bashkëpunimi në gjashtë fusha, duke përfshirë ekonominë dhe tregtinë. Ata do të forcojnë gjithashtu, partneritetin në kujdesin shëndetësor, fushën e shkencës dhe teknologjisë, parandalimin e fatkeqësive dhe shkëmbimet mes njerëzve. Media koreano-jugore raportoi se një seri bisedimesh kokë më kokë midis Yoon, Kishida dhe Li janë planifikuar të dielën, përpara takimit të të tre liderëve së bashku, një ditë më vonë. Samiti i fundit tripalësh midis tre ekonomive më të mëdha të Azisë u zhvillua në dhjetor 2019. Që atëherë, nuk janë organizuar takime për shkak të pandemisë së koronavirusit dhe marrëdhënieve të tensionuara midis Japonisë dhe Koresë së Jugut. Japonia dhe Koreja e Jugut, dy aleatë të ngushtë të SHBA-së, ranë dakord vitin e kaluar për një bashkëpunim më të fortë në fushën e mbrojtjes me Uashingtonin. Nisma synon të kundërshtojë programin e armëve bërthamore të Koresë së Veriut dhe rritjen e pranisë ushtarake të Kinës në rajon. Media e Koresë së Jugut spekuloi se Yoon dhe Kishida do t’i kërkonin Kinës të ushtronte ndikim më të madh në Phenian në mosmarrëveshjen bërthamore. Sipas shifrave të OKB-së nga muaji shkurt, Kina mbetet partneri më i madh tregtar i Koresë së Veriut deri tani.
