Turqia do të presë samitin e OKB-së për klimën vitin e ardhshëm, ndërsa Australia do të udhëheqë negociatat e konferencës midis qeverive, sipas një marrëveshjeje kompromisi që po merr formë në bisedimet në Brazil, tha sot kryeministri australian, Anthony Albanese, sipas “Reuters”.
Konferencat vjetore të COP janë forumi kryesor në botë për nxitjen e veprimeve klimatike.
Sipas një marrëveshjeje kompromisi të arritur në Cop30 në Brazil, Australia do të udhëheqë negociatat ndërkombëtare gjatë konferencës, ndërsa Turqia do të merret me organizimin dhe pritjen.
Marrëveshja u arrit pas bisedimeve intensive midis ministrit australian të Klimës, Chris Bowen dhe homologut të tij turk, Murat Kurum.
Sipas marrëveshjes, Turqia do të mbajë presidencën formale të Cop31, ndërsa Australia do të emërohet “presidente e negociatave”, duke i dhënë Kanberra-s ndikim të konsiderueshëm në drejtimin e bisedimeve mbi zgjidhjet globale për krizën klimatike.
Kompromisi erdhi pas një bllokimi të paqartë që kërcënoi të zhvendoste samitin në selinë e OKB-së për klimën në Bon, një opsion që Gjermanisë nuk i pëlqeu dhe e konsideroi të dëmshëm për procesin global të klimës.
Australia argumentoi se ruajtja e konsensusit ishte thelbësore për të shmangur një vit bllokimi politik në negociata.
Vendimi ka shkaktuar zhgënjim të madh midis aktivistëve mjedisorë, investitorëve të industrisë së pastër dhe disa vendeve të Paqësorit – të cilat prej disa kohësh kanë theksuar nevojën për organizimin e samitit në rajonin e tyre – për të reflektuar kërcënimin ekzistencial që paraqet ngrohja globale.
Grupet e klimës i kanë bërë thirrje Australisë të përdorë rolin e saj udhëheqës për të çuar përpara kërkesat e Paqësorit, duke përfshirë heqjen graduale të lëndëve djegëse fosile dhe sigurimin e financimit të ri dhe të drejtë – për të adresuar dëmet klimatike.
