TURQI: Rajoni i goditur nga tërmeti i rrezikuar në dimër

Shoqata Mjekësore Turke (TTB) bëri thirrje për masa paraprake të përshtatshme për të mbrojtur mbi një milion njerëz në strehimoret e përkohshme, në provincën juglindore të Hatay, një nga qytetet më të goditura nga tërmetet shkatërruese të shkurtit. “Rajoni duhet të marrë masa për të mbështetur strehimoret dhe spitalet e përkohshme gjatë sezonit të dimrit”, tha përfaqësuesi i Shoqatës Mjekësore Turke të Hatay, Sevdar Yılmaz. Përmbytjet e papritura goditën Hatay këtë javë, duke prekur të paktën 5 000 njerëz në shtëpi me kontejnerë dhe tenda. Imazhet e shpërndara nga media lokale treguan kontejnerë të përmbytur, tenda dhe një spital fushor në Hatay, përgjatë kufirit sirian. Përmbytja e fundit tregon se ne nuk jemi aspak të përgatitur për dimrin”, tha Yılmaz. “Shumica e kontejnerëve nuk mund të përballojnë stuhi të forta, ndërsa një përmbytje më e madhe mund të çojë në përhapjen e sëmundjeve për shkak të ujit të ndotur”, paralajmëroi Yılmaz. “Në Hatay, rreth një milion njerëz jetojnë në tenda ose strehimore të improvizuara, duke përfshirë refugjatë nga Siria fqinje”, sipas Shoqatës së Mjekësisë Turke. Rreth 160 000 të tjerë jetojnë në kontejnerë. Më 6 shkurt, tërmetet e dyfishta vranë më shumë se 50 000 njerëz në Turqinë juglindore dhe Sirinë veriore. Disa mijëra njerëz jetojnë ende në strehimore të përkohshme. Qeveria turke ka premtuar se do të zhvendosë disa prej tyre në apartamente të sapondërtuara para fundit të këtij viti.