Turistja gjermane shërbehet me profesionalizëm në Vlorë, sjellë në jetë foshnjën 31-javëshe

Një turiste gjermane, 22-vjeçare është shërbyer në kohë dhe me profesionalizëm në Spitalin e Vlorës, aty ku ka sjellë në jetë foshnjën e saj vetëm 31-javëshe, në një lindje të parakohshme. Ministrja e Shëndetësisë dhe Mbrojtjes Sociale, Ogerta Manastirliu teksa informoi se nëna dhe fëmija gëzojnë shëndet shprehu mirënjohjen ekipeve mjekësore për përgjigjen ndaj emergjencave në këtë sezon turistik. “Aktualisht i porsalinduri po trajtohet në shërbimin e specializuar në Maternitetin “Koço Gliozheni”. Siç e pohojnë mjekët, nëna dhe fëmija gëzojnë shëndet. Mirënjohje ekipeve tona mjekësore për përgjigjen ndaj emergjencave në këtë sezon turistik”, u shpreh Manastirliu në rrjetet sociale. Në zonat turistike të vendit janë hapur 29 qendra shëndetësore, për të garantuar kujdes shëndetësor cilësor për pushuesit dhe turistët që do të frekuentojnë Shqipërinë këtë sezon veror. Në këto qendra shëndetësore shërbejnë 160 mjekë dhe infermierë të trajnuar për emergjencat. Në veri funksionojnë 8 qendra shëndetësore, nga të cilat katër janë në zonat turistike malore (Valbonë, Razëm, Tamarë dhe Theth) dhe katër të tjera në plazhet Velipojë, Rrjoll, Shëngjin e Tale në Lezhë. Në Durrës funksionojnë 4 qendra shëndetësore, konkretisht në plazhet Gjiri i Lalëzit, Currila, Plazhi i Vjetër dhe Shkëmbi i Kavajës, ndërsa në Kavajë funksionojnë qendrat 24-orëshe në plazhet Golem dhe Mali i Robit. Në rajonin e jugut funksionojnë këto qendra shëndetësore verore: Në Pogradec; në Lushnjë në plazhin e Divjakës; Në Fier në plazhin e Darëzezës; Në Vlorë në katër plazhe, konkretisht në Zvërnec, Plazhi i Vjetër Vlorë, Radhimë, Orikum; Në Bashkinë Himarë: Palasë, Dhërmi, Drimadhes, Himarë, dhe Qeparo. Në Sarandë në plazhet Borsh, Ksamil i vjetër dhe Ksamil i Ri.