Gjatë periudhës janar-mars 2025, tregu i titujve të borxhit të Qeverisë së Shqipërisë jashtë Bursës ka shfaqur një aktivitet të lartë, me pjesën më të madhe të transaksioneve që i përkasin ankandeve të organizuara nga shteti dhe shlyerjes së titujve kur arrijnë maturimin.
Përkatësisht, 54.83% e volumit total i takon transaksioneve në tregun primar, ndërsa 37.15% i përket shlyerjes së vlerës nominale në maturim.
Në tregun sekondar, ku titujt tregtohen pasi janë blerë fillimisht, obligacionet afatgjata kanë dominuar me 64.29% të volumit, ndërsa bonot e thesarit kanë përbërë 35.71%. Megjithatë, në aspektin e numrit të transaksioneve, bonot e thesarit janë përdorur më shumë, duke zënë 76.80% të totalit.
Tregu sekondar është dominuar nga investitorët individualë, të cilët kanë kryer 97.08% të të gjitha transaksioneve.
Dominimi i investitorëve individualë (97.08% e transaksioneve) tregon se qytetarët po interesohen gjithnjë e më shumë për investimet në tituj të qeverisë. Kjo mund të ofrojë mundësi të reja për qytetarët që të investojnë kursimet e tyre në një formë relativisht të sigurt dhe me interes më të mirë sesa depozitat bankare.
Tre llojet kryesore të transaksioneve, të quajtura B, C dhe F, kanë pasur ndryshime të dukshme krahasuar me të njëjtën periudhë të vitit të kaluar.
Transaksionet e tipit B, që përfshijnë shitjen e titujve nga portofoli i bankave apo shoqërive komisionere, kanë pësuar një rritje të lehtë në vlerë prej 46 milionë lekë ose 3.05%, por numri i këtyre transaksioneve është ulur me 46.96%.
Transaksionet e tipit C, që lidhen me blerjen e titujve nga bankat përpara maturimit nga investitorët, janë rritur ndjeshëm si në vlerë, me 395 milionë lekë ose 74.18%, ashtu edhe në numër transaksionesh, me 24.69%.
Ndërkohë, transaksionet e tipit F, që përfaqësojnë ekzekutimin e urdhrave të klientëve pa përdorur fondet e vetë subjektit, kanë shënuar një rritje rekord prej 657 milionë lekë ose 32,828%, dhe numri i tyre është rritur me 2,900%.
Në total, transaksionet e këtyre tre llojeve janë rritur me rreth 1,098 milionë lekë, duke reflektuar një interes në rritje për tregtimin e titujve të qeverisë jashtë Bursës
