Transferta e pakushtëzuar për bashkitë, 21.7 miliardë lekë në 2023

Shpenzimet e buxhetit vendor për vitin 2023, janë parashikuar në masën 65.5 miliardë lekë, me një rritje prej 8.8% më shumë se buxheti i vitit 2022. Sipas relacionit të p/buxhetit, i cili është publikuar nga Ministria e Financave dhe Ekonomisë, këto shpenzime për vitin 2023, zënë 3% të PBB-së nga 2.3% që zinin në vitin 2013. Referuar relacionit, transferta e pakushtëzuar për vitin 2023, krahasuar me vitin 2022 është 3 miliardë lekë më shumë ose rreth 16.1 për qind më e lartë dhe krahasuar me vitin 2015 (viti para reformës administrativo-territoriale), është 9.4 miliardë lekë më shumë ose rreth 76.4 për qind më e lartë. Në transfertën e pakushtëzuar të parashikuar për vitin 2023, 21.7 miliardë lekë, do të shtohen edhe fondet prej 9.8 miliardë lekë transfertë e pakushtëzuar sektoriale për funksionet e reja. Në total, në vitin 2023, granti nga buxheti i shtetit për pushtetin vendor do të jetë në shumën 31.5 miliardë lekë. Të ardhurat e veta të pushtetit vendor nga viti 2015 në vitin 2023 kanë pësuar një rritje të ndjeshme me rreth 17.4 miliardë lekë, ndërkohë krahasuar me vitin 2022 janë rritur me rreth 1.5 miliardë lekë. Gjatë viteve të fundit, procesi i menaxhimit të financave publike vendore është shoqëruar me sfida për shkak të pasojave të pandemisë COVID-19, rindërtimit nga tërmetet e vitit 2019 dhe krizës ekonomike si rrjedhojë e luftës në Ukrainë. Reformat në qeverisjen vendore ndër vite janë fokusuar si në thellimin e decentralizimit fiskal, ashtu edhe menaxhimin e financave publike në nivel vendor.